خواطر مدمن... للحياه

اتعلمت في الصغر
ماقولش انا حاسس بأيه
ولا بفكر في ايه
ولافكرت فيه ليه
لحد ما قلبي ينفجر
او امنع نفسي م الاحساس
وامشي عادي وسط الناس
وقلبي جوه حته حجر

عاوز النهارده اتعلم
حتي لو حاتألم
ازاي احس
واتعذب من الاحساس
دي الحياه لو تظلم
احلي من الموت يا ناس

اتعلمت في الصغر أسكت وما اتكلمش
ما قولشي شيء م الحقيقة
خصوصا لو بتكسف
ويوم ورا يوم بنفس الطريقة
من كتر ما بعرف
اتعلمت ما فهمشي
عارف كل شيء في الكون
ونفسي ما عرفشي

عاوز النهارده اتكلم
والاقي حد يسمعني
والاقي حد يستني
علي لحد ما اتعلم


مين انا وفين
انا ورايح فين
امتي اصارع عيوبي
وامتي لربنا استسلم

اتعلمت في الصغر
لازم اكون تمام
ما فياش ولا عيب
ولا حتي في الاحلام
وطول الوقت انا فاشل
مش قادر اكون كامل
مش قادر أكون أله
كرهت نفسي وبحاول
فاكرهها من تاني
وكل ده وانا فاكر
ان الحياه كارهاني



عاوز النهارده اكون
حقيقي ع الاخر
مش كامل لكن مقبول
والنعمة شايلاني
محبوب.... ومسؤل
عن عقلي وجناني


اتعلمت في الصغر
ما صدقشي غير نفسي
ما شوفشي غير
اللي بتلمسه ايدي
واحاسب م الكبير
واخافه واقوله يا سيدي
واحاول ابقي انا سيده
وأوطي أبوس ايده


وربنا......؟
سيبه علي جنب....
ده الكبير خالص
طول عمري عايز ارضيه
لحد ما سبته خالص

وحتي وانا أل ايه معاه
مابعرفهوش خالص


دلوقت عاوزأصدق
في الله ونفسي و التانيين
وأشوف الحب واتحقق
ولو مش شايف برضه أصدق
ان القلب مش لازم
يبقي من لون واحد
مع الخير ولو لسه مابانشي
والخير في الارض قاعد
وعمره ماحايمشي